01- KEI´ BIER Et fing aan wie ne janz normale Ovend En mingem Ihrefelder Stammlokal Bes dä Ferdi aan zo hetze fing: »Jung, drink schneller – dat Zeusch weed doch bloß schal!« Un dann kome noch die Fente vum Fußballverein Dä Zappes kom bahl nimmieh hingerher Bes plötzlich – et wor nit ens halver ein – Wood hä blass un reef: »Dat letzte Fass es leer!« (»Wat es?!«) Jung, do kräät dä ävver Komplimente Mann, do wor ävver en Stimmung em Lokal Op de Desch un de Stöhl stundte die Fente Un schriee: »Nä, wat es dat unorijinal!« Kei´ Bier! (Kei´ Bier!) Woröm hammer kei´ Bier? Woröm hammer dann ald widder kei´ Bier mieh? Wat es met Bier? (Kei´ Bier!) Woröm hammer kei´ Bier mieh? Woröm hammer immer widder kei´ Bier mieh? Fastelovend en d´r Südstadt – Alaaf! Dä Franz titsch´ em Dreieck eröm Et quetschten sich immer mieh un mieh Jecke eren Datt m´r daach, die brengen sich noch öm! Bes morjens öm fünnef hät die Stimmung jekoch Do stund op eimol die Thek´ en Brand Do saat dä Franz: »Ich maach jetz Fierovend!« Jung, dat hatt hä ävver nit jekannt … Kei´ Bier! (Kei´ Bier!) … Bei Schmitzens wor Beerdijung Dä Opa Schmitz wor nimmieh do Donoh wood bei Kaffee un Kooche jeschwärmp Wat för ne feine Kääl dat doch wor Un als die Sonn dann langsam ungerjing Wood die Erdbeerbowle opjedrare Do reef däm Opa singe Kääjelsverein: »Dat söße Zeusch schläät uns op d´r Mare!« Kei´ Bier! (Kei´ Bier!) … … … ... ... ... ... ... ... ... ... ... ... ... ... ... ... ... ... ... ... ... ... ... ... ... ... ... ... © 04.05.2003: Rich Schwab, GEMA-No. 094 211 – www.richschwab.de

02- DUMMER NOCH E LETZ Halver aach. Die Sonn jeiht unger, die Dür jeiht op Do kütt dä Schängemann eren, säät: »Nä, wat ben isch hück joot drop! Un all die nette Minsche heh – do föhl isch misch jlisch ze Huss! Do loss isch misch doch nit lumpe un jevve prophylaktisch eine us!« Halver zehn. Dat Bier läuf kalt, dä Schäng läuf wärm Hät hä doch mittlerweile jlatt Ne Schunkelschoss en jedem Ärm Un laach: »Nä, wat nette Minsche heh, dat es doch ene Jrund: Do loss isch misch doch nit lumpe un jevve automatisch ens en Rund!« Jung! Kumm, dummer noch e letz, dummer noch e letz Jung! Kumm, dummer noch e allerletz Bier! Jung, kumm, dummer noch e letz! Häste noch en Zijarett? Ooch, nu kumm, Jung, dummer noch ens Füür! Halver zwölf. Die Naach es jung, dä Schäng es schäl Un singk: »Nu luurt üch doch dä Weet ens aan – Wat für ´ne nette Kääl! Nä, su ´ne nette Minsch – sag, wie hält dä uns bloß us? Do loss isch misch doch nit lumpe un jevve – quasi strategisch – eine us!« Jung! Kumm, dummer noch e letz … Halver zwei. Dä Mond steiht huh, dä Schäng steiht schräg Un schreit: »Bevür isch durch die Düür ben Bruch isch noch eine für dä Wääg! Un all die nette Minsche heh sollen och nit lääve wie ´nen Hungk Do loss isch misch doch nit lumpe un jevve solidarisch ens en Rund!« Jung! Kumm, dummer noch e letz … Halver vier. Die Sonn jeiht op, die Rollad´ jeiht erunger Dä Schäng es stief wie´n Üül un lallt: »Jetz han isch ävver Hunger! Do hät doch jlatt die Köch ald zo? Et jitt nix mieh? Na und? Wat isch nit esse, kann isch och drinke – Jung, dann nemm´ isch – eh – Praktisch ernährungsteschnisch evven allein noch en allerallerallerletzte Rund …« Jung! Kumm, dummer noch e letz … … … ... ... ... ... ...... ... ... ... ... ... ... ... ... ... ... ... ... ... ... ... ... ... ... ... ... © 17.02.2001: Rich Schwab, GEMA-No. 094 211 – www.richschwab.de

03- DIE MELODIE Op d´r Daag zick 35 Johr Hät dä Jupp dä Orjelskaste (Un verdeent si´ Jeld als Klüttemann) Un isch schwör, zick 35 Johr Spillt hä nur die schwatze Taste (Nä, die wieße, die pack hä nit aan) Un wenn hä Fierovend hät Dann litt hä sehnsüchtig em Bett Un dräump vun wieße Brikett Jeden Ovend zick 35 Johr Tritt dä Jupp en die Pedale (Die sin für do die deefe Tön) Un hä üb´ met schweißtriefende Hoor All die Tonleidere un Skale (Manchmol mieh un manchmol wennijer schön) Un dobei fluch hä en sich ren: »Nä, dat kann doch esu schwer nit sin! Jo, woröm krijjen isch dat nit hin?« Wo es dann do die Melodie? Ja, wat es dat für komisch Dinge? Wo es dann do die Melodie? Ja, wä soll dann do metsinge künne? Ja, wo es dann do die Melodie? Nä, dat jefällt mir nit Dat weed doch niemols enen Hit! Jedes Wocheeng zick 35 Johr Es dä Jupp am komponiere (Nä, su schnell jitt hä nit op) Sing Frau, die hät ald jraue Hoor Se säät: »Isch weed dat nie kapiere!« (Un schöddelt nur noch met däm Kopp) »Deit mir leid, Entschuldijung Ävver isch muss dir dat ens sare, Jung: Isch hüür do kein Veränderung …!« Wo es dann do die Melodie? … Zischmol en dänne 35 Johr Wor dä Jupp ald bei Produzente (Öm sing Hits ze präsentiere) Die komen nie met singer Musik klor Arrojante junge Fente! (Die dääten dobei noch telefoniere!) Die dääten eesch ens wischtisch hüüre Dann die Stop-Tass´ malträtiere Un dann saaten se: »Nä, do muss ävver no´jet passiere, Herr – eh , Herr – eh …« Wo es dann do die Melodie? … Ävver jetz, jetz, jetz! Noh 35 Johr Kütt däm Jupp singe jroße Daag (Jetz kritt hä endlich ens die Schangse) Dä Fessverein fiert fuffzisch Johr Un dä Jupp, dä spillt die janze Naach (Un luur ens: All sin se am Danze!) Ävver op eimol, beim Refräng Stonn se all rootlos en de Jäng: »Ja, wie …? Wat es …? Am Eng …?!« Do schreit dä Jupp: »Ja, mein Jott, jetz hüürt doch ens zo! Ja, hüürt Ihr dat dann nit?« Ja, hüürt Ihr nit die Melodie? Zick 35 Johre spill isch die! Dat es doch en einmalije Melodie!?!?« Do krijjen isch jedesmol die Nostalljie! Un wenn isch mir dat ens rischtisch beluure Ihr Banause, Ihr Fijure Isch wedde, dat weed ene Hit – hundert Pro!  …  …  …  …  … …  …  …  …  …  …  …  …  …  …  …  …  … © 27.06.2002 by: Rich Schwab, GEMA-No. 094 211 – www.richschwab.de

04- FAHRRADHELM Fröher wor ich öfters ungerwääs Do hatt ich noch Konzess… – eh, Kondition Nur manchmol schmess et mich dann vun de Fööß – Unanjenehme Sittewazion Wat weiß ich, woran et loog – vielleich et Klima De Lalla, de Hormone, et Ozon Zwanzisch Bier lang föhlten ich mich prima Un dann – dä: De Sittewazion! Do han ich mir jedaach: Nä, leeve Jung Do muss ich dringend jet dran dunn: Friedaags ovends drag ich besser minge Fahrradhelm Denn do es Affsturz projrammiert Un en mingem schöne neue neonjröne Fahrradhelm Es mir noch niemols jet passiert Jeder kennt mich schon en mingem neue Fahrradhelm Un kumm ich irjendswo durch die Dür Schreien all: Do kütt dä Friedhelm met däm Fahrradhelm! Friedhelm, dä pass zo dir! Dä Helm, dä pass esu joot op mingen Kopp Dat es en echte Kreation Am leevste hännt ich dä jo nur noch op Hännt nie mieh die Sittewazion Denn ich han mir jedaach: Es nit verkeht Vür allem, wenn dä mir och su joot steiht Friedaags ovends … Letztens wor ich op ’ner Huzick bes zum Schluss Vielleich wor et och en Kommellion Do braaten mich zwei Fraulück ohne Helm noh Huss Dä! Ald widder su en Sittewazion! Die zwei, die maaten mich eetz komatös Un schon schmess et mich ald widder vun de Fööß Nä, nä … Friedaags ovends … ... ... ... ... ...... ... ... ... ... ... ... ... ... ... ... ... ... ... ... ... ... ... ... ... ... © 19.06.2002 by: Rich Schwab, GEMA-No. 094 211 – www.richschwab.de

05- D’R LAIE Die Welt is’ alles, was der Fall is’ Sprach schon der große Philosoph Ja, wie kütt m’r dann op su jet? Bin ich dofür ze doof? Dofür hät dä Mann studiert Un jegrübelt Dag un Naach Un ich als Laie frore mich jetz Wat hät dä sich dobei jedaach? Die Welt is’ voller Fragen: Woher? Wohin? Wovon? So manches kleine Hirn, das qualmt Kurz vor der Explosion D’r Laie macht sich häufig ein völlig falsches Bild Auf seiner Stirn steh’n Fragezeichen – es is’ kurz vor TILT! Der Fachmann amüsiert sich: »Alles halb so wild! Der Laie macht sich häufig ein völlig falsches Bild!« Die Welt is’, was der Fall is’ Nur ich schnalle das nich’ Dann wör jo am Eng och ich der Fall Un wat bedück dat jetz für mich? Das Leben ist ein Drahtseilakt Un ich bin dä Akrobat Blöd is’ nur, dat Seil hier oben Is’ aus Stacheldraht! Die Welt is’, was der Fall is’ Ja, un wat es jetz heh d’r Fall? Ich als Laie wunder mich Un jläuve dat o’noch all! D’r Laie macht sich häufig ein völlig falsches Bild ... Die Welt es’, wat d’r Fall es’ Ich krijje dat nit en d’r Kopp Die ville Philosophiererei Määt mich noch janz beklopp! Ich wööd dat all jo su jään verstonn Ävver do bieße ich op Granit Wat soll m’r do bloß denke? Un vür allem och: Womit? ... ... ... ... ...... ... ... ... ... ... ... ... ... ... ... ... ... ... ... ... ... ... ... ... ... © 13.07.2011 by: Rich Schwab/Serdar Boztepe, GEMA-No. 094 211 – www.richschwab.de

06- D’R BUDDHA Do setz dä Buddha widder do, wo dä Buddha immer setz Wie fessjeklääv op singem Hocker, zwesche Appelkorn un Bier Nä, dä brengk jaanix us d'r Rouh, als wör dat alles bloß ene Wetz Hä beluurt sich nur die Welt un wat uns Minsche su passiert Hä hät för jeder e offe' Uhr un hüürt sich fründlich all uns Sorje aan Un an 'nem joode Ovend säät hä dann: »Ja, nu … Et es esu einfach – et es einfach esu« Wat m'r hät, dat hät m'r Wat m'r nit hät, hät m'r nit Wat m'r kritt, dat kritt m'r, wemm'r 't kritt Do muss m'r sich doch frore: Wat soll m'r sich noch plore? Et kütt, wie et kütt Denn et kütt, wenn et kütt, wie et kütt Ich han dä Buddha ens jefrooch: »Saach, hüür ens, du weiß doch Bescheid – Die Welt es doch su wunderbar, dat Lääve künnt su schön sin Woröm jitt et nur all dä Ärjer, all dä Strick un all dä Neid?« Do säät dä Buddha: »Häste'ns Füür? Un wör och noch e Bier drin? Ich sare Dir, wie't es, Jung: Immer noch et jrötzte Leid Es, wat d'r Minsch sich selvs aandeit! Ja, nu … Dobei es et esu einfach – et es einfach esu« Wat m'r hät, dat hät m'r … … ... ... ... ... ...... ... ... ... ... ... ... ... ... ... ... ... ... ... ... ... ... ... ... ... ... © 07.01.2013: Rich Schwab, GEMA-No. 094 211 – www.richschwab.de

07- HÄPPY AUA O-oh! Halver sechs – et schellt jlisch Alles weed hektisch Lommer, lommer, lommer och ens hinjonn Alles weed jlöcklisch: Et es Häppy Hour M’r kann die Arbeit verdränge Heh em Jedränge Lommer, lommer, lommer jet dobeistonn Hüür op zo schänge: Et es Häpy Hour (Alles zem halve Pries jetz´!) Häp-häp häp häp-häppy, häp häp-häp häp Häppy Aua Flöck jeschött! – su’n Stund es nit vun Dauer Häp-häp häp häp-häppy, häp häp-häp häp Häppy Aua Wer kei’ Jeld hät, jitt direck die nächste Rund Heh schläät däm Jlöcklische met Schmackes die Stund (Happy Hour) Do stonn se – jeknubbelt wie de Sardine Als jööv et af morje nur noch Öllischsaff Schödden sisch hektisch dä Stoff hinger de Kieme (Zum Wohl! Zum Wohl!) Mann, heh jeiht die Poss ävver aff Cocktails un´ Koote Sechsunnüngssisch Zoote Lommer, lommer, lommer och ens hinjonn Hach, deit dat joot, heh! Et es Häp-häppy Hour! Häp-häp häp … Schon schläät die Uhr ald widder Aach – Preise wie Friedaag Naach Lommer, lommer, lommer widder heimjonn! Noch eimol koot jelaach – dat wor die Happy Hour … ... ... ... ... ...... ... ... ... ... ... ... ... ... ... ... ... ... ... ... ... ... ... ... ... ... © 25.04.2001: Rich Schwab, GEMA-No. 094 211 – www.richschwab.de

08- 22 BIER Mein Schatz, ich hatt’re hück zwar zweiunzwanzisch Bier Doröm kumm ich jo och esu fröhlich durch die Dür Na joot, dann hatt’ ich noch dä eine Oder och dä and’re kleine Klitzekleine koote Klare Un die Kräuter för d’r Mare Ävver besoffe, mein Schatz, jläuv et mir Besoffe ben ich nur vun dir Großer Jubel: Freitagabend! Endlich aus dem Laden raus! Endlich hammer Feierabend Nein, wir jehn noch nich’ nach Haus Die Kollejen woll’n noch was bereden Also Überstunden unter uns am Tresen Plötzlich war es wieder später als jedacht Drum komm’ ich erst jetzt nach Hause Mitten in der Nacht – und sach: Mein Schatz … Arbeitstrinken nennt m’r sowat Mann, dat jeht an die Substanz Dauernd will m’r endlich jehen Doch man jeht ja nie so janz Die Kollejen woll’n noch Würfel drehen Alle lassen proper ihren Hobel stehen Mein Jott, wie die Zeit verjeht: Schon wieder viertel nach! Liebchen, schau mich nich’ so böse an Hör zu, was ich dir sach: Mein Schatz … Ich komm’ doch immer wieder Liebend jern zu dir zurück Schließlich bist du doch immer noch Mein allerjrößtes Jlück Mein Schatz … Die Kollejen wollten mich nich’ jehen lassen Immer wieder hieß es wieder: Hoch die Tassen! Aber jetz’ is’ alles jut, denn jetz’ bin ich ja hier Können diese Augen lügen? Liebstes Liebchen, jlaube mir: Mein Schatz … … … … … … … … … … … … … … … … … … … … … … © 09. 03. 2000 by: Rich Schwab, GEMA-No. 094 211 – www.richschwab.de

09- FREMBJONN Nä, Schatz, wat hammer widder Spaß jehatt Wat hammer vill jelaach Jedanz, jedonn, jemaat un watweißich Dovun bin ich jetz noch platt Wat en wunderbare Naach Vermiss’ han ich nur eins, Schatz – nämlich dich Jetz maach doch nit esu Jeseech Un krech dich widder en Ich bin doch widder do Wo ich am allerleevste bin Ach, Schatz, ich wööd dir doch niemols frembjonn Niemols! Niemols! Op keine Fall! Nä nä, ich wööd dir doch niemols frembjonn Niemols! Nä, ich kenne die doch all Keine Angst, mein Schatz – ich kenne die doch all … Der Mensch lebt nicht vom Brot allein M’r bruch och Freud dobei Wenn du kein Loss ze danze häss Kumm, maach dich doch nit jeck: Wer nit kütt, hät frei Ävver besser es m’r zwei Et nemmp jo keiner keinem he jet weg Jetz treck nit su ’e Schnütche Un frooch nit, wo ich wor Wenn du mir nit die Leevste wörs’ Wör ich doch jaanit do Ach, Schatz, ich wööd dir doch niemols frembjonn … Jetz maach doch nit esu Jeseech Un krech dich widder en Ich bin doch widder do Wo ich am allerleevste bin Ach, Schatz, ich wööd dir doch niemols frembjonn … … … … … … … … … … … … … … … … … … … … … … … © 04.04.2005: Rich Schwab, GEMA-No. 094 211 – www.richschwab.de

10- LAACHE ES JESUND La-la-la-laache es jesund Sing-sing-sing-singe es joot für de Lung Bütz-bütz-bütz-bütze es joot für et Hätz Un doröm dummer dat och all – un zwar jetz: Hi-hi, ho-ho, ha-ha! Schmatz! Schmatz! (8x) Die Saison es eröffnet Et weed widder jefiert Mir sin für alles jewappnet Für jede Blödsinn präpariert D’r Rhing erop, d’r Rhing eraff Jeiht die Poss hück widder aff Un övverall, wo’t Jecke jitt Maache se met: La-la-la-laache es jesund … Mir trecke löstije Hötcher op Schunkele övver de Strooß Un wärme uns met Danze op Un eins, zwei, drei jeiht et loss D’r Rhing erop, d’r Rhing eraff … La-la-la-laache es jesund … Mir trecke komije Plute aan Un schmieße uns en’t Jewöhl Danze als Karnevals-Karawan’ Övver Desche un Stöhl D’r Rhing erop, d’r Rhing eraff … La-la-la-laache es jesund … Un für all die, die su fröhlich jetz dobei sin Hammer ene joot jemeinte Root: Dat muss am Aschermittwoch nit vorbei sin Dat alles deit et janze Johr janz joot …! … … … … … … … … … … … … … … … … … … … … … © 11.01.2013 by: Rich Schwab, GEMA-No. 094 211 – www.richschwab.de

11- EINE WELT Mensch, wievell dousend Minsche Lääven heh zick Johr un Daag Quasi ein Familisch Wo sich jeder mag Die Hüsje stonn esu staatz Un die Minsche sin esu nett Ach, wat jööv manch einer dröm Wenn hä su e Veedel hätt! Heh hätt jeder singe Plaatz Für si’ Auto, singe Hungk un si’ Bett Dröm: So leid es uns auch tut: Mir sin komplett komplett Es jibt nur eine Welt, un dat es unser Veedel Die heile kleine Welt, die uns allein jehürt Es jibt nur eine Welt, un dat es unser Veedel Heh will doch keiner hin Dröm kütt och keiner rin Denn wä heh rinkütt, stürt Mensch, wievell dousend Minsche Trecken durch die Welt? Woröm? Wat weiß dann ich Wat dänne do jefällt? Dat soll uns och ejal sin Mir blieve, wo m’r sin Dröm: Jleiches Recht für alle: Die solle och blieve, wo se sin! Mir jönne jedem singe Plaatz Wo hä sing Heimat hät Et muss jo nit jrad heh sin Mir sin jo ald komplett Es jibt nur eine Welt … Tja: Unser Arsch is d’r Nabel d’r Welt … … … ... ... ... ... ...... ... ... ... ... ... ... ... ... ... ... ... ... ... ... ... ... ... ... ... © 26.o4.1990: T: Rich Schwab & Wilfried Schmickler / M: Rich Schwab

12- JEDE JECK ES ANDERS Ach, wat wor dat fröher schön doch en Colonia Wenn ich dat schon hüre, krijjen ich ald zovell Domols wor et och nit besser als wie´s hückzedaach Jo, do kann mir wer verzälle, wat hä will Do joov et Kreeje, Räuber, Lüschner, Pess un Cholera Joov et Hexejäjer, Zoff un Fisternöll Jo, dat kütt, weil d´r Minsch zick Sodom un Jomorrhia Eines einfach nit kapiere kann un will Je-je-je- jede Jeck, (Jeck!) jede Jeck (Jeck!) Jede (Jede?) Jede! Jeck (Jeck!) Jede Jeck, (Jeck!) jede Jeck (Jeck!) es anders Do kannste doch jaanix dran maache Jede Jeck … Höchstens eine zem Oberjeck maache Jede Jeck … Oh, jo – un´ dä dann klone un klone un klone un klone Eetz eine, dann zwei, dann dreihundert Millione Die janze Welt bloß ein Zoot Klon (Clown!) Klon! Wat en öde Coloniasation! Die wören dann Janove, Penner, Priester un Verteidijungsminister Wöre Marieche, Schötze, Funke oder Industriehalunke Bulle, Bonze, Boxer, Bausenator, Punker, Popper, Zocker, Zappes Vun Hollywood bis Hollymünd alles eine kaale Kappes Jeder mit däselve jecke Jene – wat ene Stuss – Dat heeltsde doch im allerjeckste Kopp nit us! Nä-nä-nä- Jede Jeck … Jetz stell d´r vüür, mir hätten all en runde rude Pappnas em Jeseech Ene decke Buch, ene decke Hals un drömeröm en Riesenfleech Jeder hänt en fussije Pürck un vürrendran en decke Trumm Un´ heute blau un morjen blau un dann Kollektivdelirium Jeder met dämselve schäle Kopp – na, joode Naach! Do däten doch all bedde, morje wör d´r Jüngste Daag! Nä-nä-nä- Jede Jeck … … schnieke Prunz …? Wat reimp sich dann bloß op Prunz …? ... ... ... ... ... ... ... ... ... ... ... ... ... ... ... ... ... ... ... ... ... ... ... ... ... © o9.o5.1998: Rich Schwab, GEMA-Nr. 094 211 – www.richschwab.de

13- ÄSCHERMETTWOCHMORJE Wat en Party, wat e Fess! Nur noch mir zwei heh Sin d’r Ress Wat e Wunder – wat e Jlöck Drei Daag zesamme Fröhlich op Jöck Un op eimol es et Äschermettwochmorje Dä Nubbel längs e Häufje Äsch Un langsam maache ich m’r Sorje: Soll et dat jetz jewäse sin Oder jommer noch woanders hin? Et es Äschermettwochmorje Jetz einfach tschüs zo sare Wör doch Blödsinn … Drusse singk einer Schief un heiser »Bye bye« Leevje, wat weed jetz Us uns zwei? Denn op eimol … … … … … … … … … … … … … … … … … … … … … … … © 2019: Rich Schwab, GEMA-Nr. 094 211 – www.richschwab.de

14- ET WILMA WAAT Un et Wilma waat Op dä letzte Walzer Un dä Tünn bläddert en singem Handy wie en ’nem Booch Hä hät vun dä janze Danzerei jenooch Merk jaanit, wie et Wilma wibbelt Wie et aan de Näjjel knibbelt Un hä hürt och nit dat Jeräusch Deef hingen en ihrem Hals Dat Jeräusch zwesche Laache un Kriesche För dat mir jaakeine Name han Wenn m’r Sehnsucht esse künnt, denk et Wilma Söch ich us wie die Plaat Un et luurt dä Tünn aan Dä dat widder jaanit metkritt Un et fällt ihr – womöschlich zem eetzte Mol – op Datt hä och nit jrad schlanker jewoode es Die letzte paar Johr Un et Wilma waat Wör ich’m doch bloß ens frembjejange Denk et Wilma un kichert heimlich en sich eren Un weiß jaanit, wie se jetz dodrop kütt Ävver se frööch sich: Wo sin eijentlich all die Schlössel Vun dä Schlösser aan däm Jitter op d'r Hohenzollernbröck? Un wat es wohl jewoode us all däm Jlöck, dat do hängk? Tonnewies Jlöck, datt se ald Angs han Die Bröck däät nimmieh lang halde Ävver wahrscheinlich hält die länger Als all die Verspreche, die do hänge Un langsam vüür sich hin roste Denk et Wilma un waat Un et Wilma waat Op dä letzte Walzer Un dä Tünn bläddert immer noch en singem Handy Als wör et e Booch Hä hät vun dä janze Danzerei jenooch Un als die Kapell dann endlich fäädisch es Met Superjeile Zick Un die andere all, fäädisch vun dä Höpperei un dä Brüllerei Die Thek belarere Un dä Sänger jnädisch (ihr Pfündsche en d’r Täsch) Wilmas Wunsch erfüllt Un die Kapell My Heart Cries For You spillt – Mie Hätz kriesch för dich – Do es et Wilma janz allein op dä Danzfläch Allein met Dean Martin Un däm Jeföhl wie … Wie all die Jeföhle för d’r Tünn Dä do drövve jrad langsam vum Stohl rötsch D’r letzte Schabau noch en d’r Hand … … … … … … … … … … … … … … … … … … … … … … © 2019: Rich Schwab, GEMA-Nr. 094 211 – www.richschwab.de